Кегейли районы «Ақтуба» аўыл пуқаралар жыйыны Хожа аўылы турғыны Нзанов Базарбай 2020-жыл 19-май күни «Ақтуба» аўыл пуқаралар жыйыны аймағындағы «Айназар баба» фермер хожалығы басшысы Айназаров Ораз аймағында жасаўшы пуқаралардың үй қапталы қыйтақ жерлерин суўғарыў ушын суў бермей атырғанын айтып Өзбекстан Республикасы Президентиниң Қарақалпақстан Республикасы Кегейли районы Халық қабыллаўханасына аўызеки мүрәжат, Кегейли районы хәкимлигиниң электрон мүрәжат бот каналына жазба мүрәжат еткен. Бул мүрәжат бойынша Кегейли районы Мәҳәлле ҳәм шаңарақты қоллап-қуўатлаў бөлими ҳәм усы машқаланың шешилиўине байланыслы тийисли шөлкемлер тәрепинен исши топар дүзилип, үйренилип шығылды. Үйрениў барысында Айназаров Ораз басқарған «Айназар баба» фермер хожалығы аймағындағы пуқаралардың үй қапталы тамарқа жерлерин суўғарыў ушын суў берилетуғынлығын, бирақ аўыл халқының тамарқа жер участкаларын суўғарып болғаннан кейин ўақтында сағаны байлап, керексиз жерлерге ағын суўды бийкарға ысырап етпеў керек екенлигин мәлим етти. Фермер хожалығы баслығы Айназаров Ораз аўыл халқы тамарқа жерлерин суўғарыўда ағын суўдың бийкарға ысырап етилетуғынлығы ҳаққында наразышылығын билдирди. Себеби, усы ўақытқа шекем аўыл халқы тамарқа жер участкаларын суўғарып болғаннан кейин сағаны байламастан суў жүретуғын салманың бағыты менен керексиз жерлерге ағызып, ағын суўдың ысырап болыўына жол қойылып атырғанлығын айтып өтти ҳәм алдағы ўақытларда суўдың ысырапкершилигине жол қоймай аўыл халқы тамарқа жер участкаларын суўғарыў ушын иркиниш болмайтуғынлығын билдирди.
Сондай-ақ үйрениў барысында Пуқара Нзанов Базарбай усы аймақта палыз-бақша өнимлерин жетистириў ушын шөлкемлестирген «Еркебай Базарбаев» фермер хожалығы жерлерин суўғарыў ушын «Айназар баба» фермер хожалығының суў бермей атырғанлығы бойынша шикаят етти. Районлық Ирригация бөлими қәнигесиниң мағлыўматы бойынша бул жап-салмалар фермер хожалықлары балансына тийисли екенлигин, суўғарыў жумысларын өз-ара келисим жолы менен алып барыў керек екенлигин мәлим етти. Сәўбетлесиў барысында пуқара Нзанов Базарбай шөлкемлестирген «Еркебай Базарбаев» фермер хожалығының ағын суўдан пайдаланыў бойынша районлық Ирригация бөлими менен шәртнама дүзилмегенлиги анықланды. Пуқара Нзанов Базарбайға шәртнама тийкарында жумыс жүргизиў ҳәм фермер хожалықларына қараслы жап-салмалардан өз-ара келисим менен суўғарыў жумысларын алып барыў кереклиги ҳаққында түсиник жумыслары алып барылды.
Кегейли районы хәкимлиги мәлимлеме хызмети
