Экономиканы, исбилерменлерди қоллап-қуӯатлаӯ бойынша Президент Пәрманы имзаланды

15.04.2020 13:36:03 697 Баспаға шығарыў

Бүгинги күнде пүткил дүнья, инсаният қыйын дәўирди бастан өткермекте. Мәмлекетимизде эпидемиологиялық жағдайды сапластырыў, халықтың саламатлығын ҳәр тәреплеме қорғаў ҳәм исбилерменлик субъектлерин қоллап-қуӯатлаӯға барлық илажлар көрилмекте.

Коронавирус пандемиясы дәӯринде халықты, экономикалық тармақлары ҳәм исбилерменлик субъектлерин қоллап-қуӯатлаӯға байланыслы қосымша ис-илажлар ҳаққындағы Өзбекстан Республикасы Президентиниң ПФ-5978 Пәрманы қабыл етилди.

Пәрманға көре:

Бириншиден туристик ҳәм мийманхана искерлиги менен шуғылланыўшы исбилерменлер усы жыл жуӯмағына шекем жер ҳәм мал-мүлк салықларын төлеӯден азат етиледи. Оларға социаллық салық ставкасы ҳәзирги 12 проценттен 1 процентке түсириледи. Усы жеңилликтен тараӯда хызмет көрсетип атырған мыңнан артық субъектлер пайдаланыӯ имкәниятына ийе болады;

Екиншиден, карантин дәӯринде өз искерлигин тоқтатыӯға мәжбүр болған жеке тәртиптеги исбилерменлерге дәрамат салығы ҳәм социаллық салықты есаплаӯ тоқтатылады. Усы жеңиллик дерлик 150 мың жеке тәртиптеги исбилерменге үлкен көмек болады;

Үшиншиден, түсими өткен айдағына қарағанда 50 процентке кемейгенде киши бизнес субъектлерине айланбадан алынатуғын салық, жер салығы, мүлк салығы, социаллық салық ҳәм суӯ салығын төлеӯ мүддети усы жыл 1-октябрге шекем кешиктириледи. Исбилерменлер бул жеңилликлерден салық кеңсесин үйден турып хабардар етиӯи мүмкин;

Төртиншиден, усы жылдың 1-апрелинен баслап юридикалык шахслардың тәбиий газ ҳәм электр энергиясы ушын алдыннан төлеӯ мәжбүрияты әмелдеги 100 проценттен 30 процентке түсириледи;

Бесиншиден, Исбилеменлик искерлигин қоллап-қуӯатлаӯ фонды тәрепинен жәрдем бериӯ көлеми жәнеде кеңейтириледи.

Ҳәзирги күнде исбилермен алған кредит ставкасы 24 процентке шекем болғанда оның 8 процентин фонд қаплап берер еди. Енди кредит ставкасы 28 процентке шекем болғанда да оның 12 процентин мәмлекет қаплайды.

Буның ушын исбилеменлердиң 3 трилион сӯмлық кредитлери процентин қаплаӯға фондтан қосымша 400 миллиард сӯм бағдарланады. Фонд бир исбилерменниң тек ғана бир жойбарына кепиллик бериӯи бойынша шеклеӯда енди бийкәр етиледи.

Интизамлы ҳәм исенимли исбилерменлерге кредиттиң 75 процентине фонд кепиллик береди (бүгинги күнде 50 процент). Кепиллик сӯммасының жоқары шегарасыда 8 миллиард сӯмнан 10 миллиард сӯмға асырылады;

Алтыншыдан, қыйын аӯҳалдағы кәрханалар, жеке тәртиптеги исбилерменлер ҳәм халықтың 12 триллион сӯмлық кредит мәжбүрияты мүддети узайтырылады.

Жетиншиден, халықты, әсирисе оның социаллық қорғаӯға мүтәж қатламын қоллап-қуӯатлаӯ бойынша бир қатар илажлар белгиленбекте.

Атап айтқанда, усы жыл ақырына шекем ун, өсимлик майы, гөш ҳәм сүт өнимлери, қумшекер, гигиена қураллары сыяқлы тийкарғы тутыныӯ товарларын импорт қылыӯда бажыхана бажы ҳәм акциз салығы өндирилмейди.

Сондай-ақ, усы жыл март-июнь айларында мүддети тамамланатуғын балалы шаңарақларға напақа, бала күтими напақасы ҳәм материаллық жәрдемлерди төлеӯ ушын қосымша мүрәжат ҳәм ҳүжжетлер талап етилмейди. Олар автоматик тәризде 6 айдан 1 жылға узайтырылады. Усы дәӯирде басқа мүтәж шаңарақларға да усындай напақалар тайынлаӯ даӯам еттириледи.

Бул илажлар арқалы және 120 мыңнан зыят кем тәмийинленген шаңарақлар қамтып алынады (ҳәзирде 600 мың).

Карантин дәӯринде жалғыз кекселер ҳәм майыплығы болған шахсларға 18 түрдеги тийкарғы азық-аӯқат ҳәм гигиена товарлары пулсыз жеткерип бериледи.

Сегизиншиден, карантин дәӯринде үй шараятында раӯажландырыӯ мүмкин болған искерлик түрлери жәнеде қоллап-қуӯатланады.

Усы тараӯ ушын усы жыл және 50 миллион доллар қәрежет бағдарланбақта.

 

Кегейли районы әдиллик бөлими баслығы: С.Асанов

15.04.2020 13:36:03 698