Кегейли районы “Бахытлы” ҳәм “Қуяшлы” МПЖ турғынларының 11-февраль күни youtube тармағында турақ жайлар ҳаққында мүрәжатына рәсмий жуўап

18.02.2020 15:16:53 1145 Баспаға шығарыў

 

Кегейли районы “Бахытлы” ҳәм “Қуяшлы” МПЖ турғынларының 11-февраль күни youtube тармағында турақ жайлар ҳаққында блогерге мүрәжати жолланған. Бул мәселе бойынша Кегейли районы ҳәкимлиги тәрепинен исши топар дүзилди хәм үйренип шығылды. Усы орында сизге төмендегилерди мәлим етип билдиремиз.

Өзбекстан Республикасы Министрлер Кабинетиниң 2014-жыл 7-январь күнги 1-санлы қарары менен тастыйықланған «Көшпес мүлкке болған ҳуқықларды мәмлекетлик дизимнен өткериў тәртиби ҳаққында»ғы Нызамының III–бөлиминиң 23-бәнтине тийкар ҳәм Кегейли районы ҳәкиминиң 2018-жыл 28-апрель күнги  №448-04-санлы «Пуқаралардың ҳәзирги ўақытта жасап атырған турақ жайларын атына бекитип бериў ҳаққында»ғы шешими менен Кегейли районы «Бахытлы» МПЖ аймағы Халқабад гүзары көшесинде жайласқан пуқара Кудайназарова Рита Есназаровнаға, Қалмуратов Дастан Тилеуовичке, Тореева Зухра Абатбаевнаға, Бердимуратова Мнайхан Убайдуллаевнаға, Насратдинов Караматдин Утениязовичке, Утемуратова Гулзархан Мырзабаевнаға, Айымбетов Оразымбет Арзымбетовичке, Бердимуратов Махсет Убайдуллаевичке, Есемуратова Маржангул Жангабаевнаға, Төрениязов Расберген Өтениязовичке, Тажимуратов Кутлымурат Шамуратовичке, Алламбекова Мнайхан Алламбергеновнаға ҳәм «Қуяшлы» МПЖ аймағы Халқабад гүзары көшесинде жайласқан пуқара Таңирбергенова Мастура Махсетовнаға турақ жайлары атына бекитип берилген. Видеобилдириўдеги пуқаралардың  турар жайларының гүзар жол тәрепи қәўендерлер жәрдеминде районымыздың көрки  ушын абаданластырыў мақсетинде исленген.

Ѳзбекстан Республикасы Президентиниң 2018-жыл 29-марттағы  «Абат аўыл» дәстүри хаққындағы ПФ-5386-санлы Пәрманы ҳәм Ѳзбекстан Республикасы Президентиниң 2018-жыл 29-марттағы  «Абат аўыл» дәстүрин 2018-жылда әмелге асырыў бойынша косымша ис-илажлар  туўрысында»ғы ПҚ-3630-санлы қарары тийкарында Кегейли районы аймағынан «Бахытлы ҳәм Қуяшлы» МПЖ таңлап алынған. «Абат аўыл» дәстурине киргизилген  «Бахытлы» ҳәм «Қуяшлы» МПЖ аймакларындағы  Нөкис-Шымбай дәрбент жолында жайласқан.  Халкабад гүзары көшесиниң архитектуралық көринисин жақсылаў мақсетинде  0,95 км аралыққа  бас жоба ислеп шығылған ҳәм тастыйықланған. Мүрәжатта көрсетилген пуқаралардың жасап турған турақ жайлары орнына  район Бас жобасы бойынша жаңадан көп қабатлы турақ жайлар қурылысы белгиленген.  Режени әмелге асырыў мақсетинде «Бахытлы ҳәм Қуяшлы» МПЖ пуқараларына  ески  үй-жайларының бузылыўы хаққында ескертиў қағазы берилген.

Пуқаралар менен сәўбетлесип, түсиник жумысларын алып барыў нәтийжесинде режедеги тазадан салынатуғын жайларға ҳәзирги күнге шекем буйыртпашылар болмағанлығы себепли бул реже әмелге асырылмады. Өзбекстан Республикасының Үй-жай кодексиниң 24-статьясына тийкарланып «Үй, квартира мүлкдарлары өзлерине тийисли болған үй, квартираның сақланыўы, тийисли техник ҳәм санитариялық жағдайын жақсылаў, оларды өзлериниң есабынан жеңил ҳәм капитал оңлаў  жумысларын әмелге асырыўы шәрт» екенлиги көрсетилгенлигин билдиремиз. Ѳз гезегинде имәратларының хәзирги жағдайынан наразы болған пуқараларға  төмендегилерди усыныс сыпатында келтирип өтемиз.

Бүгинги күнде Өзбекстан Республикасы Президентиниӊ 2019-жыл 28-ноябрьдеги ПП-5886-санлы «Ипотека кредити механизмлерин жетилистириўге байланыслы қосымша ис-илажлар туўрысында»ғы Пәрманы ҳәм Өзбекстан Республикасы Президентиниӊ 2018-жыл 24-ноябрьдеги «Аўыл аймақларында  пуқаралар ушын арзан үй-жайлар қурыўды кеӊейтиўге тийисли қосымша ис-илажлар ҳаққында»ғы ПҚ-4028-санлы қарарыныӊ орынланыўын тәмийинлеў мақсетинде Район ҳәкиминин 2019-жылы 19–декабрь күнги №3714-12 – санлы қарары менен Кегейли районы «Жузим бағ» аўыл пуқаралар жыйыны «Басар» елатлы пункти аймағынан 4 (төрт) қабатлы 24 (жигирма төрт) хожалыққа мөлшерленген, барлық  қолайлықларға ийе болған турақ жайлар киши массиви қурылысы ушын жер майданы ажыратылды ҳәм усы турақ жайларға талабанлар анықланбақта. Жоқарыда аты көрсетилген пуқаралар усы турақ жайлардан  тийисли хүжжетлер тийкарында алыўына болатуғынлығын мәлимлеймиз.

Және де мүрәжат ийелери шаңарақ ағзаларының жумыссыз екенлигин мәлимлеген. Бирақ,  бул пуқаралар Кегейли районлық Бәнтликке көмеклесиў орайында жумыссызлар дизиминде анықланбады. Ҳәзирги күнде районда жаңадан ашылып атырған кәрханалар тийкарында бир нешше бос жумыс орынлары ашылмақта. Бул бойынша районлық Бәнтликке көмеклесиў орайында жумыссызлар дизиминде дизимнен өтип, бос жумыс орынлары менен танысыўы ҳәм өзлериниң қәнигеликлери бойынша жумысларға қабыл етилиўи мүмкин екенлигин  мәлимлеймиз. Усы орында  “Бахытлы” МПЖ турғыны Раметова Шийрин сентябрь айынан баслап материаллық жәрдем напақасын алып отырғанын билдиремиз.

Утемуратова Гулзарханның 1998-жылы туўылған қызы  Утемуратова Гаухар, Ералиева Шүкрижанның 1995-жыл туўылған баласы Елмуратов Қудияр Қаржаубаевичти жумыс пенен тәмийинлеў мақсетинде  Кегейли районы ҳәкимлиги тәрепинен алып барылып атырған ислер ҳаққында мағлыўмат берип өтемиз.   «Жаслар бәнтлигин тәмийинлеў бойынша мәнзилли реже» тийкарында  район аймағындағы жер майданлары ажыратылады, 5х10 көлеминде ыссыханалар шөлкемлестирилип ҳам буның нәтижесинде жаслар бәнтлиги тәмийинленеди.

Районымызда  шарўашылық ҳәм қусшылыққа қәнигелестирилген фермер хожалығын шөлкемлестириў арқалыда жаслар бәнтлиги тәмийинлениўи режеге киргизилген.

Сондай-ақ районда жасларды  балықшылық фермер хожалығы ҳәм пал ҳәррешилик пенен бәнт етиў режелестирилген.

Буннан тысқары районда жәми 3 га жер майданға жаслардың дем алыў орайы ҳәм жаслар бағын жаратыў режелестирилген. Бул жумысларға жәмийетшилик тийкарында жасларды  3 ай мүддетке тийисли белгиленген айлық тийкарында жумысқа қабыл етиў жобаластырылған.

 

    Кегейли районы ҳәкимлиги Mәлимлеме хызмети

 

18.02.2020 15:16:53 1146