“Milliy qádiriyatlar-keleshegimiz tiykarı”
Úrp-ádet, salt-dástúrler ázelden xalqımızdıń tariyxıy ótmishi hám milliy ózgesheligin kórsetetuǵın milliy qádiriyatlarımız bolıp tabıladı.
Milliy qádiriyatlarımız-keleshek áwlad tárbiyasında eń tásirli quralımız. Insannıń ruwxıy dúnyası, estetikalıq talǵamı hám oy-pikirin bayıtıwda, jaslarımızdıń sana-sezimi, mádeniy-aǵartıwshılıq kóz-qarasların jetilistiriwde ayrıqsha ahmiyetke iye.
Hár bir xalıqtıń milliy qádiriyatların onıń tariyxı, mádeniyatı, ózine tán úrp-ádetleri, dástúrleri bar. Qádiriyatlar – bul jámiyettiń sociallıq-ekonomikalıq, mádeniy-ruwxıy rawajlanıwınıń nátiyjesi. Sonıń ushın da qádiriyatlarda zamannıń ruwhı, imkaniyatları, sol zamanda jasaǵan adamlardıń arzıw-úmitleri, talap hám mútájlikleri óz kórinisin tabadı. Búgingi kúnde milliy qádiriyatlardı tiklew, rawajlandırıw, xalıq sıpatında ózligimizdi biliw, ruwxıy qádiriyatlar sistemasın jaratıw, yaǵnıy bul ana watanǵa húrmet, ata-babalar ruwhına sadıqlıq, úlkenge húrmet, kishige izzet, uyat, iybe sıyaqlı ózgesheliklerdi asırap abaylaw, keyingi áwladqa jetkiziw ulıwma milliy wazıypalardıń tiykarın quraydı.
Jańa Ózbekstannıń 2022-2026 jıllarǵa mólsherlengen Rawajlanıw strategiyasında «Ruwxıy rawajlanıwdı támiyinlew hám tarawdı jańa basqıshqa alıp shıǵıw» baǵdarınıń 71-bap 259-bántinde «Xalıqtıń milliy qádiriyatları hám ruwxıy miyrasın asırap-abaylaw, keń en jaydırıw hám de rawajlandırıwdı mámleket tárepinen qollap-quwatlaw» wazıypası belgilengen. Hár bir xalıq, hár bir millettiń ózi qádirleytuǵın mádeniyatı, tili, úrp-ádet, dástúrleri, ádep normaları, jáne ózine tán ótmishi, mádeniy ruwxıy qádiriyatları bar.
Ózbekstan Respublikası Prezidenti Sh.M.Mirziyoyevtıń «Jaslarımız erkin pikirleytuǵın, joqarı intellektual hám ruwxıy jetiklikke iye insanlar bolıp kámal tabıwı, baxıtlı bolıwı ushın mámleketimiz hám jámiyetimizdiń bar kúsh hám imkaniyatların jaratıp beremiz» degen pikirlerinde jas áwladtı milliy qádiriyatlar tiykarında jetik, barkamal etip tárbiyalaw kózde tutılǵan. Joqarı ruwxıy qádiriyatlardı milliy idea hám aǵartıwshılıq penen uyǵınlıqta alıp barıwda ulıwma insanıy qádiriyatlar, tálim-tárbiya, ilim pán hám ádep-ikramlılıqtıń ornı ózgeshe. Shıǵısta usı qádiriyatlardı perzentler sanasına sińdiriw shańaraqtan baslanadı. Óytkeni shańaraqta milletke tán bolǵan qarım-qatnas mádeniyatı, mehir-muhabbat, ar-namıs sıyaqlı ádep-ikramlılıq normaları, insanıylıq páziyletler kámil insandı qáliplestiriwde áhmiyetli rol oynaydı. Kámil insan degende eń dáslep dúnya qarası keń, watanına sadıq, óz pikirine iye, minez-qulqı menen ózgelerge úlgi bolatuǵın juwapkershilikli hám salamat insanlardı túsinemiz. Birinshi náwbette ádep-ikramlılıq, ruwxıy qádiriyatlar, yaǵnıy bir-birewge ǵamxorlıq qılıw, kekselerge húrmet kórsetiw sıyaqlı páziyletlerdi shańaraqta ata-analardıń perzentlerine beretuǵın hám óz náwbetinde ata-babaları, tuwǵan-tuwısqanları hám basqa da jaqınları tárepinen berilgen tárbiyası arqalı ózlestiredi. Insan tek tárbiya arqalı ǵana kámillikke erisedi.
Demek hár bir millettiń ruwxıy baylıǵı milliy hám ulıwma insanıylıq qádiriyatlardıń birliginen quraladı. Ruwxıy miyras ótmishtiń jemisi. Onı tolıq, ádil iyelew hám rawajlandırıw házirgi áwlad wazıypası. Óz mádeniy miyrasın, qádiriyatların bilmew yamasa mensinbew máńgúrlik esaplanadı. Olardı bayıtıp, joqarı dárejege kóteriwge háreket etpew millet hám onıń keleshegi ushın úlken joǵaltıw. Ruwxıylıǵı joqarı dárejede rawajlanǵan insan ǵana erkin Watanımızdıń ullı keleshegi ushın miynet etedi.
B.Matekov Respublika Ruwxıylıq hám aǵartıwshılıq orayı Kegeyli rayonlıq bólimi baslıǵı
