“Мәдений мийрасқа мениң үлесим! ! ! ” Республикалық акциясы

11.11.2023 16:02:47 128 Баспаға шығарыў

Кегейли районында жайласқан “Ийшан қала” комплексинде“Мәдений мийрасқа мениң үлесим! ! ! ”  атамасындағы Республикалық акцияс шөлкемлестирилди. Ҳәр айда өткерилиўи дәстүрге айланған бул-акция Қарақалпақстан Республикасы  Мәдений мийрас басқармасы, Қарақалпақстан Республикасы Прокуратурасы ҳәм Бердақ атындағы Қарақалпақ мәмлекетлик университети  басламасы менен Қарақалпақстан Республикасы аймағындағы тарыйхий-мәдений мийрас естеликлерин сақлаў,  тарийхын үйрениў,  оларды үгит-нәсиятлаў,  жасларымызға материаллық мәдений мийраслар обйектлери ҳаққында кеǹ мағлыўматлар бериў,  көп әсирлик  тарийхымиздан сөзлеўши бийбаҳа археологиялық ҳәм архитектуралық естеликлерин келешек әўладқа пүтин ҳалында жеткериў ҳәм оларды тарийхымызға ҳүрмет руўхында тәрбиялаў мақсетинде өткерилмекте.

Акцияға Қарақалпақстан Республикасы Прокуратурасы,  Қарақалпақстан Республикасы  Мәдений мийрас басқармасы хызметкерлери,  Бердақ атындағы Қарақалпақ мәмлекетлик университетиниң Тарийх факултети оқытыўшылари ҳәм студентлери, Кегейлирайоны жаслары ҳәм Ғалаба хабар қураллары ўәкиллери қатнасты.

Илажды Қарақалпақстан Республикасы  Мәдений мийрас басқармасы баслығы Қ.Шарипов,  Қарақалпақстан Республикасы Прокурорыныǹ аға жәрдемшиси А. Джумамуратов, район прокуроры И.Абдуллаев ҳәмБердақ атындағы Қарақалпақ мәмлекетлик университетиниң Тарийх факултети деканы С.Сулайманов илажды ашып берди ҳәм олар өз сөзинде бундай илажларда жаслардың қатнасыўы зәрүрлигин,  жаслар басламалары тарийхымызды асыраў ҳәм үйрениўде ең әҳмийетли фактор екенлигин айтып өтти.

Акция даўамында қатнасыўшиларға Қарақалпақстан Республикасында жайласқан  Мәдений мийрас обйектлери менен бир қатарда“Ийшан қала” комплекси ҳәм бул жерде жайласқан архитектуралық естеликлери ҳаққында кең мағлыўматлар берилди. Сондай-ақ,  мәдений мийрас естеликлерин сақлаў,  олардың тарийхый әҳмийети,  келешек әўладқа пүтин ҳалында жеткериўдиң мақсети түсиндирилди. Соңынан естелик әтираплары жабайы шөплер ҳәм шығынды затлардан тазаланды.

Бул илажды ѳткериўден мақсет, жасларымызды ўатансүйиўшилик, миллий ҳәм улыўма инсаныйлық қәдириятларға ҳүрмет руўхында, уллы ата-бабаларымызға мүнәсип мийрасхорлар етип тәрбиялаў, аймағымыздағы дыққатка ылайық тарийхый орынларға саяхатларды шѳлкемлестириў ҳәм бул бағдардағы жумысларды еледе раўажландырыўдан ибарат.

Кегейли районы ҳәкимлигиниң Мәлимлеме хызмети

 

11.11.2023 16:02:47 129