PREZIDENT PÁRMANÍ, JEŃILLIKLER HÁM IMKANIYАTLAR

05.09.2022 11:22:08 218 Баспаға шығарыў

Xabarıńız bar, usı jıldıń 26-avgust kúni húrmetli Prezidentimiz Sh.M.Mirziyoev Qaraqalpaqstan Respublikası Joqarǵı Keńesiniń náwbetten tısqarı 34-sessiyasında qatnasıp, sessiyada Qaraqalpaqstanda isbilermenlikti rawajlandırıw, agrar tarawdaǵı máslelerdi sheshiw, sanaat joybarların kóbeytiw, infrastrukturanı, xalıqtı sociallıq qorǵaw, jaslardı qollap-quwatlaw boyınsha bir qatar jeńilliklerdi beriw boyınsha zárúr tapsırmalardı bergen edi.

Usı jıldıń 31-avgust kúni, sessiya kún tártibinde kóterilgen máseleler, berilgen tapsırmalar hámde Qaraqalpaqstan Respublikasınıń ekonomikalıq hám sociallıq rawajlanıwın jańa basqıshqa alıp shıǵıwdı názerde tutıwshı – Ózbekstan Respublikası Prezidentiniń PP-213-sanlı Pármanı qabıl etildi.

Álbette, mámleketimizde qabıl etilip atırılǵan nızamshılıq hújjetleri, túpkilikli reformalar eń dáslep «Insan qádiri ushın» degen iygilikli princip tiykarında ámelge asırılmaqta.

Usı orında atap ótiwimiz lazım, keyingi 6 jıllıqta Aral boyı aymaǵın, sonıń ishinde Qaraqalpaqstan Respublikasın kompleksli rawajlandırıwǵa qaratılǵan bir qatar Prezident hújjetleri hám Húkimet qararları qabıl etildi hám olarda xalqımız ushın birqatar jeńillikler berildi.

Máselen, Ózbekstan Respublikası Prezidentiniń 2017-jıl 18-yanvardaǵı «2017-2021-jıllarda Aralboyı regionın rawajlandırıw mámleketlik baǵdarlaması haqqında»ǵı Qararında Qaraqalpaqstan Respublikası hám Xorezm wálayatı ushın balalar baqshasına, «Bárkamal áwlad», kórkem-óner hám muzıka mekteplerindegi shınıǵıwlar ushın ata-analardıń hár aylıq tóleminiń muǵdarı 2 esege kemeytirildi, mútáj hám kem támiynlengen shańaraqlarǵa bir márte beriletuǵın materiallıq járdem formasındaǵı sociallıq napaqa engizildi.

Sonday-aq, 2017-jıldıń 1-fevral kúninen baslap usı aymaq ushın temir jol hám aviajolawshılar biletlerin satıp alıw ushın jeńillikler berilip, xalqımız olardan usı jıldıń basına shekem paydalanıp keldi.

Mine Prezidentimizdiń jańa Pármanı menen, 2022-jıl 15-sentyabrden baslap Qaraqalpaqstan Respublikası hám Xorezm wálayatlarında jasaytuǵın jasına baylanıslı pensiya hám napaqa alatuǵınlar, mayıplıǵı bolǵan adamlar ushın temir jol hám aviajolawshılar ushın biletlerdi satıp alıwda 50 procentlik jeńillikli tarifler qayta tiklendi.

Sonıń menen bir qatarda, 2022-jıl 1-oktyabrge shekem «Sociallıq qorǵawdıń birden-bir reestri» málimleme sisteması arqalı anıqlanǵan kem támiyinlengen shańaraqlarǵa qıs máwsimin qosımsha shıǵınsız ótkeriw ushın (kómir, suyıltırılǵan gaz, azıq-awqat, basqa da zárúrlikler ushın) hár bir kem támiyinlengen shańaraqqa bazalıq esaplaw muǵdarınıń 2 esesi muǵdarında bir mártelik materiallıq járdem pulları ajıratılıwı belgilendi.

Elimizde hár dayım jaslar siyasatı – mámleketlik siyasat dárejesinde qarap kelinedi.

Ásirese, olarǵa sapalı tálim beriw, jaslardı joqarı oqıw orınlarına qamtıp alıw, olardı ilimli-bilimli etiw, kásip-ónerge úyretiw, bántligin támiyinlew áhmiyetli wazıypa sıpatında belgilengen.

Jańa Pármanda bilimlendiriw hám jaslar máseleleri de orın alǵan.

Atap aytqanda, 2022-2023-oqıw jılında Qaraqalpaqstan Respublikasında ulıwma orta, orta-arnawlı hám professional bilimlendiriw mákemelerin tamamlaǵan 500, keyingi jılları ushın bolsa hár jılı 1-sentyabrge shekem 6 500 jaslar wálayatlardaǵı mámleketlik joqarı bilimlendiriw mákemelerine qosımsha qabıllaw parametrleri tiykarında oqıwǵa qabıl etiledi;

Qaraqalpaqstan Respublikasındaǵı mámleketlik joqarı bilimlendiriw mákemelerin kúshli professor-oqıtıwshılar menen támiyinlew maqsetinde mámleketimizdiń jetekshi joqarı oqıw orınlarında ekologiya, awıl xojalıǵı, irrigaciya hám qurılıs baǵdarları boyınsha jolǵa qoyıladı;

2022-jıl 1-oktyabrden baslap Qaraqalapqstan Respublikası aymaǵında mektepke shekemgi bilimlendiriw tarawında mámleketlik-jeke menshik sheriklik boyınsha kelisimlerge qol qoyıw, burınǵısınan basqasha tárizde, Qaraqalpaqstan Respublikası Mektepke shekemgi bilimlendiriw ministrligi tárepinen ámelge asırıladı;

2022-jıl 1-oktyabrden baslap 5 jıl múddetke Qaraqalpaqstan Respublikası aymaǵındaǵı mámleketlik emes bilimlendiriw shólkemleriniń oqıw procesine qamtıp alınǵan sırt elli qánigeler (oqıtıwshılar) Ózbekstan Respublikası aymaǵında jumıs islew huqıqın beretuǵın tastıyıqnamalardı rásmiylestiriw hám beriw (sozdırıw) ushın óndiriletuǵın tólem, Ózbekstan Respublikasına kiriw vizasın alıw ushın konsullıq jıyımlar hám jasaw ornına dizimge alıw ushın óndiriletuǵın mámleketlik bajı tóleminen azat etiledi.

Sonıń menen bir qatarda, Párman menen tastıyıqlanǵan jol kartaǵa tiykar, 2022-2024-jıllarda Qaraqalpaqstan Respublikası máhállelerinde miyirbiykelik qánigeligi boyınsha oqıwdı tamamlaǵan hám házirgi waqıtta jumıssız bolǵan hayal-qızlardıń mamanlıǵın asırıw arqalı bántligin támiyinlew wazıypası qoyılǵan. Bunda «Ishga marhamat» monooraylarında miyirbiykeler mamanlıǵın asırıw kursları jumısları jolǵa qoyıladı.

2022-2026-jıllarda Qaraqalpaqstanda mektepke shekemgi bilimlendiriw, ulıwma orta bilimlendiriw hám medicina obektlerin qurıwǵa mámleketlik byudjet esabınan qosımsha 5 trillion sum ajıratıladı.

 

Kegeyli rayonı adillik bolimi baslıga S.Asanov

05.09.2022 11:22:08 219