Ózbekstan Respublikası Prezidentiniń qararı tiykarında Qaraqalpaqstan Respublikası Máhálle hám shańaraqtı qollap-quwatlaw ministrligi shólkemlestirildi.
Búgin Qaraqalpaqstan Respublikası Joqarǵı Keńesinde májilis ótkerilip, usı ministrlikke tayınlawlar ámelge asırıldı.
Turmanov Saǵındıq Turganbaevich Qaraqalpaqstan Respublikası Máhálle hám shańaraqtı qollap-quwatlaw ministri etip tayınlandi. Ol bir waqıttıń ózinde Qaraqalpaqstan Respublikası Ministrler Keńesi Baslıǵınıń orınbasarı lawazımında jumıs alıp baradı.
S.Turmanov usı kúnge shekem Qaraqalpaqstan Respublikası Joqarǵı Keńesiniń Nızamlılıq, sud-huqıq hám korrupciyaǵa qarsı gúresiw máseleleri komiteti baslıǵı, Isbilermenler háreketi – Ózbekstan Liberal-demokratiyalıq partiyası Qaraqalpaqstan Respublikalıq Keńesi baslıǵı lawazımlarında islegen.
Sonıń menen birge, Qaraqalpaqstan Respublikası Máhálle hám shańaraqtı qollap-quwatlaw ministriniń birinshi orınbasarı lawazımına Maryam Ahmedova, orınbasarları lawazımına Sharap Usnatdinov hám Ómirbay Turdıbaevlar tayınlandı.
Qaraqalpaqstan Respublikası Joqarǵı Keńesi Baspasóz xızmeti
