25-fevral kúni Qaraqalpaqstan Respublikası Joqarǵı Keńesinde Ózbekstan Respublikası Prezidentiniń 2020-jıl 11-noyabrdegi «2020-2023-jıllarda Qaraqalpaqstan Respublikasın kompleksli sociallıq-ekonomikalıq rawajlandırıw ilajları haqqında»ǵı qararında sharayatı awır bolǵan máhálle hám awıllarda xalıqtıń turmıs sharayatın jaqsılaw hám aymaqlardı abadanlastırıw esabınan olardı awır kategoriyadan shıǵarıw jáne máhálleniń ornı hám rolin kúsheytiw boyınsha belgilengen wazıypalardı nátiyjeli ámelge asırıw máselelerine baǵıshlanǵan seminar shólkemlestirildi.
Videokonferencbaylanıs tárizinde ótkerilgen ilajǵa Ózbekstan Respublikası Oliy Majlisi Senatı aǵzaları, Qaraqalpaqstan Respublikası Joqarǵı Keńesiniń deputatları, húkimeti aǵzaları, sektorlardıń hám tarawlardıń basshıları, ǵalaba xabar qurallarınıń wákilleri, sonday-aq, xalıq deputatları qala hám rayonlıq Keńesleri deputatları, puqaralardıń ózin-ózi basqarıw wyımları basshıları qala hám rayon studiyalarında qatnastı.
Ilajdı Qaraqalpaqstan Respublikası Joqarǵı Keńesi Baslıǵınıń orınbasarı A.Davletov kiris sóz benen ashtı hám basqarıp bardı.
Ózbekstan Respublikası Oliy Majlisi Senatınıń Aralboyı aymaǵın rawajlandırıw máseleleri boyınsha komitet baslıǵı B.Alixanov, komitet baslıǵınıń orınbasarı B.Matmuratov, Qaraqalpaqstan Respublikası Joqarǵı Keńesiniń Nızamlılıq, sud-huqıq hám korrupciyaǵa qarsı gúresiw máseleleri boyınsha komitet baslıǵı Z.Reymova, Qaraqalpaqstan Respublikası Joqarǵı Keńesiniń Jaslar siyasatı hám salamat áwladtı tárbiyalaw máseleleri komiteti baslıǵı, Jaslar isleri agentligi Qaraqalpaqstan Respublikası basqarması baslıǵı A.Daniyarov, Qaraqalpaqstan Respublikası Máhálle hám shańaraqtı qollap-quwatlaw ministri S.Turmanov hám basqaralar sózge shıǵıp, Húrmetli Prezidentimizdiń 2020-jıl 11-noyabrdegi «2020-2023-jıllarda Qaraqalpaqstan Respublikasın kompleksli sociallıq-ekonomikalıq rawajlandırıw ilajları haqqında»ǵı qararı elimizdiń ekonomikalıq potencialın arttırıw menen bir qatarda qala hám rayonlardıń, máhálle hám awıllardıń kórinisin túpkilikli ózgertiw, puqaralardıń mashqalaların sheshiw, xalqımızǵa múnásip turmıs sharayatın jaratıwda úlken áhmiyetke iye ekenligin atap ótti.
Usı qarar menen sharayatı awır 45 máhálle hám awılda xalıqtıń turmıs sharayatın jaqsılaw, aymaqlardı abadanlastırıw ushın 20 ǵa jaqın baǵdar boyınsha ilajlar rejesi belgilengen. Rejege muwapıq, sharayatı awır máhálle hám awıllarda 437 obektte jumıs alıp barılıwı hám onı ámelge asırıw ushın jámi 3 trillion swmǵa jaqın qarjı ajıratılıwı belgilengen.
Atap aytqanda, 12 rayon orayında «Máhálle orayları» komplekslerin qurıw hám rekonstrukciyalaw, 157 máhálle hám awıl hákimshilik komplekslerin qurıw, sharayatı awır máhálle hám awıllarda úy-jaylar qurılısı, jol, elektr energiyası, tábiyiy gaz, ishimlik suwı támiynatı, málimleme-kommunikaciya texnologiyaların rawajlandırıw, sociallıq taraw obektlerin qurıw hám ońlaw, abadanlastırıw, sonday-aq, isbilermenlikti jedel rawajlandırıw, xalıqtı jumıs penen támiyinlew maqsetinde usı aymaqlarda sanaat, awıl xojalıǵı, xızmet kórsetiw tarawların rawajlandırıw sıyaqlı áhmiyetli baǵdarlardı óz ishine alǵan.
Búgingi kúnde máhálle hám awıllarda jollarǵa sheben tósew, kópirlerdi ońlaw, sonday-aq, gaz, elektr, ıssılıq támiynatın jaqsılaw, transformatorlardı ońlaw hám jańadan ornatıw, sımaǵashlardı beton ústinlerge almastırıw sıyaqlı jumıslar ámelge asırılmaqta.
Sonday-aq, “Temir dápter”, “Hayallar dápteri” hám “Jaslar dápteri” engizilip, sharayatı awır máhálle hám awıllarda jasawshı xalıqtı, ásirese, jaslardı jumıs penen támiyinlew, olardıń dáramatların arttırıw arqalı shańaraqlardı kámbaǵallıqtan qutqarıw boyınsha ámeliy jumıslar baslap jiberildi.
Ilajda Húrmetli Prezidentimizdiń Ferǵana hám Namangan wálayatlarına saparı dawamında ayırım máhállelerge barıp, ol jerdegi kemshilik hám mashqalalarǵa itibar qaratqanı, juwapker basshılardıń biypárwalıǵı haqqında sóz etilip, bul sıyaqlı mashqala hám kemshilikler elimizdegi ayırım máhállelerde de uщırasatuǵınlıǵı atap ótildi hám olardı saplastırıw boyınsha wazıypalar belgilendi.
Sonday-aq, Prezidentimiz tárepinen belgilep berilgen jańa sistemanı ámeliyatqa engiziw, yaǵnıy hár bir alıp barılıp atırǵan jumıslardı, reformalardı “máhállebay” shólkemlestiriwdi támiyinlew, sonıń menen birge, bul proceste mámleketimiz basshısı, húkimet tárepinen qabıl etilip atırǵan qararlardıń orınlanıwın támiyinlewde parlamentlik qadaǵalawdı kúsheytiw, orınlarda sociallıq-ekonomikalıq jaqtan jaǵdayı awır aymaqlarǵa biriktirilgen xalıq deputatları rayonlıq (qalalıq) Keńesleri deputatlarınıń belsendiligin arttırıw boyınsha pikir hám usınıslar bildirildi.
Qaraqalpaqstan Respublikası Joqarǵı Keńesiniń baspasóz xızmeti
