Húkimetimiz tárepinen xalqımızdıń mámleketlik xızmetlerden paydalanıw dárejesin jaqsılaw hámde olarǵa jánede qolaylıqlar jaratıw maqsetinde Párman hám qararlar qabıl etilmekte.
Atap aytqanda, solardan biri, bunnan úsh jıl aldın Mámleketlik xızmetler agentliginiń shólkemlestiriliwine tiykar bolǵan Ózbekstan Respublikası Prezidentiniń 2017-jıl 12-dekabrdegi PF-5278-sanlı «Xalıqqa mámleketlik xızmetler kórsetiwdiń milliy sistemasın túpten reformalaw is-ilájları haqqında» ǵı Pármanı joqarıdaǵı sózimizdiń ayqın dáliyli esaplanadı.
Bul Pármanǵa tiykar Ózbekstan Respublikası Ádillik ministrligi janındaǵı Mámleketlik xızmetler agentligi shólkemlestirildi.
Mine búgin Mámleketlik xızmetler agentliginiń shólkemlestirilgenligine de 3 jıl toldı. Usı qısqa waqıt aralıǵında Mámleketlik xızmetler orayları xalqımızdıń shın mánisinde isenimine aylanıp úlgerdi. Usı 3 jıl dawamında biziń Kegeyli rayonı mámleketlik xızmetler orayı tárepinen kóplegen unamlı isler ámelge asırıldı. Mámleketlik xızmetler orayları tárepinen kórsetiletuǵın mámleketlik xızmetler sanı 140 tan astı, sonıń menen birge kóplegen mámleketlik xızmetlerdiń kórip shıǵıw múddetleri qısqartılıp, múrájat etiwshilerden talap etiletuǵın hújjetler sanı 2 esege qısqardı.
Atap aytqanda, orayımız tárepinen 3 jıl dawamında fizikalıq hám yuridikalıq shaxslarǵa jámi 86 mıń mámleketlik xızmetler kórsetildi. Sonnan 1316 isbilermenlik subektleri sıpatında yaǵnıy 447 yuridik shaxs sıpatında, 869 jeke tártiptegi isbilermenlik subektleri mámleketlik dizimnen ótkerilip,. sonnan usı jıl yaǵnıy, 2020-jıl dawamında 37 500 mámleketlik xızmetler kórsetilip, solardan 500 den aslam yuridik shaxs hám jeke tártiptegi isbilermenlik subektleri sıpatında mámleketlik dizimnen ótkerildi.
Sonday-aq, rayon orayınan alıs aymaqlarǵa shıǵıw arqalı puqaralardıń waqıtların tejew hámde olardıń uzaǵın jaqın qılıw, sonıń menen birge imkániyatı sheklengen puqaralarǵa qolaylıqlar jaratıw, puqaralarımızǵa tarawımızǵa tiyisli bolǵan normativ-huqıqıy hújjetlerdiń mazmun-mánisin túsindiriw maqsetinde olardıń jasap turǵan orınlarına barǵan halda 3 jıl dawamında 8 mıńnan aslam kóshpeli mámleketlik xızmetler kórsetilip, sonnan usı jılda 2407 kóshpeli mámleketlik xızmetler kórsetildi.
Búgingi kúnde Mámleketlik xızmetler orayları arqalı ámelge asırılatuǵın mámleketlik xızmetlerdiń sanı 140 tan asqan bolsa, bul kórsetkish 2023-jılǵa shekem 400 ge jetkeriliwi rejelestirilgen. Orayımız tárepinen hár bir xızmet túrin elede ápiwayılastırıw hámde jánede puqaralarımızǵa qolaylıqlar jaratıw maqsetinde Mámleketlik xızmetler agentliginiń Qaraqalpaqstan Respublikası basqarmasına turaqlı túrde usınıslar berilip barılmaqta.
Puqaralarǵa mámleketlik xızmetlerdi óz múddetinde hám sapalı etip orınlaw biz oray xızmetkerleriniń tiykarǵı wazıypamız hám puqaralar usı xızmetlerden razı bolsa biziń maqtanıshımız bolıp tabıladı.
A.Dauekeev
Kegeyli rayonı Mámleketlik
xızmetler orayı direktorı
